اول شي عيد اضحى سعيد

اول شي عيد اضحى سعيد
وكالعاده في صباح كل اول يوم عيد اضحى من الصبح بكير منقوم على الصلاه وشكل الواحد فينا مثل مومياء رمسيس,منقوم على المسجد وكل هم الواحد يلاقي لحام مثل العالم والناس يدبحنا هالراسين ونخفي اثار الجريمه بكياس زباله قبل ما يلتم الذبان وتتجمهر البسس اللي صارلها من يوم ما ارتفعت الاسعار ملاذها الوحيد بقايا وجبة شورما جاج مرميه من 3 اشهر بالحاويه قبل ما الناس تحول على البقوليات والعدس

يوم عاااااااادي جدا بعد صلاة العيد نزلنا على المكان المعتاد محل ما بتجمعوا اللحامين خنشوفلنا ابن حلال يخلصنا من هالهم ويريح هالخاروفين على اساس وقوع البلاء خير من انتظاره
وضلينا بحدود الساعه منلفلف ومنفتل لقلنا بكره العيد
هييييييك لحتى لقينا زلمه واضح انو بالاربعين حامل بأيدو صندوق حديد ولابس قشاط كلو سكاكين
منظرو من بعيد بوحي انو زلمه نيته والله اعلم لابس القشاط كأنو نازل على عمليه ارهابيه او ناوي على نيه سوده
قلنا ليس وأول ما قربنا عليه بالسياره مد راسو عالشباك وقبل ما احكي اي كلمه قبل ما اتنفس اي نفس
حكالي وهو بأشرلي بأصابعو الخمسه وبقول: بعشر ليرات أطلع؟
كأنو ما علموه بالمدرسه انو رقم عشره بتطلب تمد اديك الثنتين
ول؟؟ شو عشر ليرات يزلمه لو بدي اروح على شيكاجو واجيب من المافيا قاتل مأجور ما بياخد عشرليرات عالراس
قام ضرب ضهر السياره بأيدو وبقول خلص ما اتفقنا روح شوف غيري
ياااااااااااا اللهي شو اشوف غيرك انا؟شو بدي اسوي بحالي؟
احكيلك اطلع اطلع والله لحامين من القله
ومن هناك لعند الخاروفين
لما وصلنا نزل الزلمه عدته وسن السكاكين وجهز الواضع وقال وينهم

رحت شديتلو الخاروف الاول وربطت الثاني منيح منيح منيح
بلاش يفلت رباطو ويشوف صاحبو بدنبح وهات اخلص عاد انا اصلا دوبني اواسي اخوي الصغيرواخفف عليه لما اشوفو حزنان وببكي ولسه بدي اقعد اشجع بخاروف؟؟ خاروف هاد حيوان شو بدي اقعد احكيلو
؟؟؟!!!
حط السكين على هالرقبه وبسم الله الله اكبر
(دقيقة صمت)

طبعا عندنا بالمكان اللي مندبح فيه بالعاده زي طاوله رخام بحط اللحام عليها الراس وغلطة كل لحام بتتكرر كل يوم عيد
لما يسلخ الخاروف ويقطعه بنسى الراس على الطاوله
هسه دور الخاروف الثاني
قمت عليه وبيدي ضمة خس وانا حاطها عند تمو وبحكيلو والك ميشااان الله كل ولك راح تموت هسه بعدين مسكت قرونه وغطيت راسو بطشت المي وانا بترجى فيه ولك اشرب اشرب راح تموت هسه اشرب
وشد بهالخاروف ولا راضي يتحرك اترجاه يتحرك اشدو من رجليه من قرونه مش رااااضي مد رجليه منا عارف اديه المهم قصدي على اللي بكونو قدام وفردهم على الارض وحط قل وزنه الخلفي على الارض
المهم بالمنيح بالعاطل بدك تتحرك حبيبي, انا عندي عيد وناس اعيد عليها الله يسعدك!!
وبعد جدال اقدرت اسحبه محل ما اندبح الاول ..طبعا الراس بعدو على الطاوله والراس بجحر بالخاروف والخاروف بجحر بالراس
صار الموقف زي افلام الكاوبوي لما يوقف خصمين قبال بعض ويبحلقو ببعض ربع نص ساعه قبل ما واحد فيهم يزهق ويطخ عالثاني
بس هون يا عمري الموقف مختلف اللي دبح صاحبك بدو يدبحك
,قمت نتعت الخاروف ومع اول حركه اخونا فكر حاله حصان؟. ثور؟ حمار وحشي؟؟
وهات مرافصه!!الك رب واللي رب وما بهدا وبدي انعن هيك لهيك اللي بدو يمد ايدو علي
وطاخ دج واصوات كثيره طلعت
سوبر خاروف لن يهدأ لن يتوقف
واللي كان يقول انو الخاروف من الحيوانات من هسه بحكيلو انت كذاب وجاهل
اكيد الخاروف من الطيور ومش اي طيور الخاروف اكيد من الطيور الجارحه
اي عليم الله كان ينط كل نطه ولا تقول حصان طراوده
والمصيبه اذا هرب هات لحق مهو اخونا نسي انو الخرفان تعتبر من الحيوانات الداجنه
لكن الحمد لله ضليتني مرابط وصامد لأجى اللحام ومسكه بطريقه غريبه وطاااااااااخ على الارض وبسم الله الله اكبر
(بدون دقيقة صمت, اي مهو انت رفستني لبهدلت صحتي)
وهيك دبحنا الخاروفين وخلصنا والحمد لله رب العالمين
ودامت اعيادكم سعيده

happy 3eed 4 all

مو رايحه غير على هالمساكين

عيدكم مبارك
كل عام وانتم بخير Razz

عيد مبارك عليكم جمعا

مشكوور على الموضوع المتميز
كل عام وانتو بالف خيرررررر جميعا